ಇರಾನ್​ನೊಂದಿಗೆ ಸಂಪೂರ್ಣ ಯುದ್ಧವನ್ನು ನಡೆಸುವ ಇಚ್ಛೆ ನಮಗಿಲ್ಲ - ಅಮೆರಿಕ

•   Sat, Sep 21 2019 09:48:05 AM



• ವಾಷಿಂಗ್ಟನ್​, ಸೆ.21(Daijiworld News/SS): ಇರಾನ್​ನೊಂದಿಗೆ ಸಂಪೂರ್ಣ ಯುದ್ಧವನ್ನು ನಡೆಸುವ ಇಚ್ಛೆ ನಮಗಿಲ್ಲ. ಆದಷ್ಟು ಸಂಯಮದಿಂದ ವರ್ತಿಸುವುದು ಹಾಗೂ ಸಮಾಧಾನವಾಗಿ ಸಮಸ್ಯೆಗಳನ್ನು ಬಗೆಹರಿಸಿಕೊಳ್ಳುವ ಬಯಕೆ ನಮ್ಮದಾಗಿದೆ. ಆದರೂ ಆ ಪ್ರದೇಶದಲ್ಲಿನ ಭದ್ರತೆ ದೃಷ್ಟಿಯಿಂದ ಸೇನಾಪಡೆಯನ್ನು ನಿಯೋಜಿಸಲಾಗುತ್ತಿದೆ ಎಂದು ಡೊನಾಲ್ಡ್​ ಟ್ರಂಪ್​ ಹೇಳಿದ್ದಾರೆ.

  

  ಸೌದಿ ಅರೇಬಿಯಾದ ಅತಿದೊಡ್ಡ ತೈಲಾಗಾರದ ಮೇಲೆ ಡ್ರೋಣ್​ ದಾಳಿ ನಡೆದಿರುವ ಹಿನ್ನೆಲೆಯಲ್ಲಿ ಅಮೆರಿಕ ಸೌದಿ ಅರೇಬಿಯಾ ಹಾಗೂ ಯುನೈಟೆಡ್​ ಅರಬ್​ ಎಮಿರೇಟ್ಸ್​ಗೆ (ಯುಎಇ) ಅಮೆರಿಕ ತನ್ನ ಹೆಚ್ಚುವರಿ ಸೇನೆಯನ್ನು ಕಳುಹಿಸಿದೆ. ಅಲ್ಲದೆ, ಮಧ್ಯಪ್ರಾಚ್ಯದ ಉಭಯ ರಾಷ್ಟ್ರಗಳಲ್ಲಿ ಕ್ಷಿಪಣಿ ನಿರೋಧಕ ವ್ಯವಸ್ಥೆಯನ್ನು ಜಾಗೃತಗೊಳಿಸಿದೆ. ಆದರೆ, ತೈಲಾಗಾರದ ಮೇಲೆ ದಾಳಿ ನಡೆಸಿರುವ ಅನುಮಾನದ ಸಂಕೋಲೆಗೆ ಸಿಲುಕಿರುವ ಇರಾನ್​ ಮೇಲೆ ತಕ್ಷಣವೇ ದಾಳಿ ಮಾಡದಿರಲು ನಿರ್ಧರಿಸಿದೆ.

  ಈ ಕುರಿತು ಮಾಹಿತಿ ನೀಡಿರುವ ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಮಾರ್ಕ್​ ಎಸ್ಪರ್​, ಈ ಪ್ರದೇಶದಲ್ಲಿ ಹೆಚ್ಚುವರಿ ಭದ್ರತೆ ಏರ್ಪಡಿಸುವ ಮೊದಲ ಹೆಜ್ಜೆಯಾಗಿ ಈ ಕ್ರಮ ಕೈಗೊಳ್ಳಲಾಗಿದೆ. ಮುಂಬರುವ ದಿನಗಳಲ್ಲಿನ ಪರಿಸ್ಥಿತಿ ನೋಡಿಕೊಂಡು ಆ ಪ್ರದೇಶಕ್ಕೆ ಹೆಚ್ಚುವರಿ ಸೇನೆ ರವಾನಿಸುವ ಬಗ್ಗೆ ನಿರ್ಧರಿಸಲಾಗುವುದು ಎಂದು ತಿಳಿಸಿದ್ದಾರೆ.

  ಪೇಟ್ರಿಯಾಟ್​ ಕ್ಷಿಪಣಿಗಳಲ್ಲದೆ ಅತ್ಯಾಧುನಿಕ ರಡಾರ್​ಗಳು ಸೇರಿ ಅಪಾರ ಪ್ರಮಾಣದ ಯುದ್ಧೋಪಕರಣಗಳನ್ನು ಅಮೆರಿಕ ಮಧ್ಯಪ್ರಾಚ್ಯದ ಎರಡು ರಾಷ್ಟ್ರಗಳಿಗೆ ರವಾನಿಸಿದೆ. ಸಾವಿರಾರು ಸಂಖ್ಯೆಯಲ್ಲಿ ಯೋಧರನ್ನು ಅಲ್ಲಿ ನಿಯೋಜಿಸಲಾಗುತ್ತಿದೆ ಎಂದು ಅಮೆರಿಕದ ರಕ್ಷಣಾ ವಿಭಾಗದ ಅಧಿಕಾರಿ ಮೂಲಗಳು ಹೇಳಿವೆ.