ಕಾಶ್ಮೀರದ ವಿಷಯದಲ್ಲಿ ಮಧ್ಯಸ್ಥಿಕೆಗೆ ಸಿದ್ಧ - ಮತ್ತೊಮ್ಮೆ ಪುನರುಚ್ಚರಿಸಿದ ಡೋನಾಲ್ಡ್​​ ಟ್ರಂಪ್​

•   Wed, Aug 21 2019 11:05:42 AM



• ವಾಷಿಂಗ್ಟನ್​, ಆ.21(Daijiworld News/SS): ಮತ್ತೊಮ್ಮೆ ಕಾಶ್ಮೀರ ವಿಚಾರದಲ್ಲಿ ಮಧ್ಯಸ್ತಿಕೆ ವಹಿಸುವುದಾಗಿ ಅಮೆರಿಕ ಅಧ್ಯಕ್ಷ ಡೋನಾಲ್ಡ್​​ ಟ್ರಂಪ್​ ತಿಳಿಸಿದ್ದು, ಕಾಶ್ಮೀರ ಒಂದು ಸಂಕೀರ್ಣವಾದ ಸ್ಥಳ ಎಂದು ಹೇಳಿದ್ದಾರೆ.

  

  ಪ್ರಧಾನಿ ನರೇಂದ್ರ ಮೋದಿ ಮತ್ತು ಪಾಕಿಸ್ತಾನ ಪ್ರಧಾನಿ ಇಮ್ರಾನ್​ ಖಾನ್​ಗೆ ಟ್ರಂಪ್​ ಕರೆ ಮಾಡಿ ಮಾತನಾಡಿದ ಬಳಿಕ ಮತ್ತೆ ಈ ವಿಚಾರ ಪ್ರಸ್ತಾಪಿಸಿದ್ದಾರೆ ಎಂದು ತಿಳಿದುಬಂದಿದೆ. ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸಮಸ್ಯೆಗೆ ಧರ್ಮವೇ ಪ್ರಮುಖ ಕಾರಣವಾಗಿದೆ ಎಂದು ಹೇಳಿರುವ ಟ್ರಂಪ್​, ಕಾಶ್ಮೀರ ಒಂದು ಸಂಕೀರ್ಣವಾದ ಸ್ಥಳವಾಗಿದೆ. ನೀವು ಹಿಂದು ಮತ್ತು ಮುಸ್ಲಿಂರನ್ನು ಹೊಂದಿದ್ದೀರಿ, ನೀವು ಕಾಶ್ಮೀರವನ್ನು ಒಟ್ಟಿಗೆ ತೆಗದುಕೊಂಡು ಹೋದರೆ ದೊಡ್ಡವರಾಗುತ್ತೀರ ಎಂದು ಹೇಳುವುದಿಲ್ಲ. ನಾನು ಉತ್ತಮವಾದುದ್ದನ್ನೇ ಮಾಡುತ್ತೇನೆ. ಬೇಕಾದರೆ ಮಧ್ಯಸ್ತಿಕೆ ವಹಿಸುತ್ತೇನೆ ಎಂದು ವೈಟ್​ಹೌಸ್​ನಲ್ಲಿ ಹೇಳಿದ್ದಾರೆ.

  ನೀವು ಎರಡು ಪ್ರಾಂತ್ಯಗಳನ್ನು ಹೊಂದಿದ್ದೀರಾ, ದೀರ್ಘಕಾಲದವರೆಗೆ ಅವು ಉತ್ತಮವಾದದ್ದನ್ನು ಪಡೆದಿಲ್ಲ. ಇದೀಗ ಸ್ಫೋಟಕ ಪರಿಸ್ಥಿತಿ ಇದೆ. ಈ ಸಂದರ್ಭದಲ್ಲಿ ನಾವು ಸಹಾಯ ಮಾಡಬೇಕೆಂದುಕೊಂಡಿದ್ದೇನೆ. ಆದರೆ, ನಿಮಗೆ ತಿಳಿದಿರುವಂತೆ ಎರಡು ದೇಶಗಳ ನಡುವೆ ಸಾಕಷ್ಟು ಸಮಸ್ಯೆ ಇದೆ. ಹಾಗೆಯೇ ಇಬ್ಬರ ಜತೆ ಒಳ್ಳೆಯ ಸಂಬಂಧವೂ ಇದೆ. ಆದರೆ, ಈ ಸಮಯದಲ್ಲಿ ಅವರು ಸ್ನೇಹಿತರಂತೆ ವರ್ತನೆ ಮಾಡುತ್ತಿಲ್ಲ. ಇದು ಗೊಂದಲದ ಪರಿಸ್ಥಿತಿಯಾಗಿದ್ದು, ಧರ್ಮದೊಂದಿಗೆ ಬಹಳಷ್ಟು ಸಂಬಂಧವಿದೆ. ಧರ್ಮವೇ ಒಂದು ಸಂಕೀರ್ಣ ವಿಚಾರವಾಗಿದೆ ಎಂದು ತಿಳಿಸಿದ್ದಾರೆ.

  ಈ ವಾರದ ಕೊನೆಯಲ್ಲಿ ಫ್ರಾನ್ಸ್‌ನ ಬೈರೆಟ್ಸ್‌ನಲ್ಲಿ ನಡೆಯುವ ಜಿ–7 ಶೃಂಗ ಸಭೆಯ ನಡುವೆ ಮೋದಿ ಅವರನ್ನು ಭೇಟಿಯಾಗುವುದಾಗಿಯೂ ಟ್ರಂಪ್ ಅವರು ತಿಳಿಸಿದ್ದಾರೆ.