ನವದೆಹಲಿ: ಕುಲಭೂಷನ್​ ಜಾಧವ್ ಪ್ರಕರಣದ ತೀರ್ಪು ಭಾರತದ ಪರ-ಪಾಕ್ ಗೆ ಮುಖಭಂಗ

•   Wed, Jul 17 2019 10:23:36 PM



• ನವದೆಹಲಿ, ಜು 17 (Daijiworld News/SM): ಬೇಹುಗಾರಿಕೆ ನಡೆಸುತ್ತಿದ್ದಾರೆ ಎಂಬ ಆರೋಪದ ಮೇಲೆ ಪಾಕಿಸ್ತಾನ ಸರಕಾರ ಬಂಧಿಸಿರುವ ಭಾರತೀಯ ನೌಕಾಪಡೆಯ ಮಾಜಿ ಅಧಿಕಾರಿ ಕುಲಭೂಷನ್​ ಜಾಧವ್ ಅವರ ತೀರ್ಪು ಭಾರತದ ಪರವಾಗಿ ಪ್ರಕಟಗೊಂಡಿದೆ.

  

  ಕುಲಭೂಷಣ್ ಜಾಧವ್ ಅವರಿಗೆ ಪಾಕ್ ಸೇನಾ ನ್ಯಾಯಾಲಯ ವಿಧಿಸಿದ್ದ ಗಲ್ಲುಶಿಕ್ಷೆಯನ್ನು ಅಂತಾರಾಷ್ಟ್ರೀಯ ನ್ಯಾಯಾಲಯ ಅಮಾನತು ಮಾಡಿದೆ. 16 ಜಡ್ಜ್​ಗಳ ಪೈಕಿ 15 ಜಡ್ಜ್ ಗಳು​ ಭಾರತದ ಪರ ತೀರ್ಪು ನೀಡಿದ್ದಾರೆ. ಕುಲಭೂಷನ್​ ಜಾಧವ್ ಅವರಿಗೆ ಗಲ್ಲು ಶಿಕ್ಷೆ ವಿಧಿಸಲು ಪಾಕ್ ಆದೇಶ ನೀಡಿತ್ತು. ಆದರೆ, ಗಲ್ಲು ಶಿಕ್ಷೆಯನ್ನ ಮರುಪರಿಶೀಲನೆ ನಡೆಸುವಂತೆ ಪಾಕಿಸ್ತಾನಕ್ಕೆ ಅಂತಾರಾಷ್ಟ್ರೀಯ ಕೋರ್ಟ್​​ ಸೂಚನೆ ನೀಡಿದೆ.

  ಕುಲಭೂಷಣ್ ಪ್ರಕರಣದಲ್ಲಿ ಪಾಕ್​ ವಿಯನ್ನಾ ಒಪ್ಪಂದದ ನಿಯಮಗಳನ್ನ ಉಲ್ಲಂಘನೆ ಮಾಡಿದೆ. ಕುಲಭೂಷಣ್​ ಜಾಧವ್ ಅವರಿಗೆ ಪಾಕ್​ ಸರಕಾರದಿಂದ ಯಾವುದೇ ಕಾನೂನು ನೆರವು ಸಿಕ್ಕಿಲ್ಲ. ಅವರಿಗೆ ಗಲ್ಲು ಶಿಕ್ಷೆ ವಿಧಿಸುವುದು ಒಂದೇ ಪಾಕಿಸ್ತಾನದ ಇಂಗಿತವಾಗಿತ್ತು. ಭಾರತ ಕುಲಭೂಷನ್ ಪರ ಹಲವು ಮನವಿ ಮಾಡಿದರೂ ಪಾಕ್ ಅವರಿಗೆ ನೆರವು ನೀಡಿಲ್ಲ ಎಂಬುವುದು ವಾದ ಪ್ರತಿವಾದಗಳಿಂದ ಸಾಬೀತಾಗಿದೆ.