ಲಕ್ಷ ದಾಟಿದ ‘ಗಿರಿಗಿಟ್’ ಟೀಸರ್‌ - ಕೋ 'ದಂಡ' ನಿಗೆ ವೀಕ್ಷಕರು ಫಿದಾ

•   Thu, Jul 11 2019 05:39:18 PM



• ಮಂಗಳೂರು, ಜು 11 (Daijiworld News/MSP): ಕೋಸ್ಟಲ್ ವುಡ್ ನ ಸ್ಟಾರ್ ನಟ ರೂಪೇಶ್‌ ಶೆಟ್ಟಿ ಅವರ ಚೊಚ್ಚಲ ನಿರ್ದೇಶನದ ‘ಗಿರಿಗಿಟ್‌’ ಸಿನಿಮಾದ ಟೀಸರ್‌ ಅಮೇರಿಕಾದಲ್ಲಿ ಬಿಡುಗಡೆಯಾಗಿದ್ದು, ಬಿಡುಗಡೆ ಆದ ಮೂರೇ ದಿನದಲ್ಲಿ ಅರವಿಂದ ಬೋಳಾರ್‌ ಅವರ ಇಂಟ್ರೋ ಟೀಸರ್ ಈಗಾಗಲೇ ಲಕ್ಷಕ್ಕೂ ಅಧಿಕ ಮಂದಿ ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅದರಲ್ಲೂ ಲಾಯರ್ ವೇಷಧಾರಿ ಕೋ ’ದಂಡ’ ಅರವಿಂದ ಬೋಳಾರ್ ಅವರ ಡೈಲಾಗ್ ಕೇಳಿ ವೀಕ್ಷಕರು ಫಿದಾ ಆಗಿದ್ದಾರೆ.

  

  ಅಂದಹಾಗೆ ಸಿನಿಪ್ರಿಯರಿಗೆ ಕುತೂಹಲ ಹೆಚ್ಚಾಗುವಂತೆ ಮಾಡಿದ ‘ಗಿರಿಗಿಟ್‌’ ಸಿನಿಮಾ ಆಗಸ್ಟ್‌ ನಲ್ಲಿ ಬರುವುದು ಖಾತ್ರಿಯಾಗಿದೆ. ಈ ಹಿಂದೆ ಇದೇ ಚಿತ್ರದ ‘ಅಯ್ಯೋ... ದೇವಾ..’ ಎನ್ನುವ ಡೈಲಾಗ್‌ ಸಾಮಾಜಿಕ ಜಾಲತಾಣದಲ್ಲಿ ಫೇಮಸ್ ಆಗಿತ್ತು. ಇನ್ನು ‘ಗಿರಿಗಿಟ್ ’ ಚಿತ್ರದಲ್ಲಿ ನವೀನ್‌ ಡಿ. ಪಡೀಲ್‌ ದಪ್ಪ ಮೀಸೆಯ ಮಿಲಿಟ್ರಿ ಆಫೀಸರ್‌ ಗೆಟಪ್ ನಲ್ಲಿ ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸೋದು ಗ್ಯಾರಂಟಿಯಾಗಿದೆ.

  ಸಂಪೂರ್ಣ ಹಾಸ್ಯ ಪ್ರಧಾನ ಚಿತ್ರ ಗಿರಿಗಿಟ್‌ ಯುವ ಸಮುದಾಯವನ್ನು ಸೆಳೆಯುವ ಕಥೆಯನ್ನು ಹೊಂದಿದೆಯಂತೆ. ಧಾರಾವಾಹಿ ನಟಿ ಶಿಲ್ಪಾ ಶೆಟ್ಟಿ ಅವರು ಈ ಚಿತ್ರದಲ್ಲಿ ರೂಪೇಶ್‌ ಗೆ ಜೋಡಿಯಾಗಿದ್ದಾರೆ. ಈ ಚಿತ್ರಕ್ಕೆ ಕಥೆ ಮತ್ತು ಚಿತ್ರಕಥೆ ರೂಪೇಶ್‌ ಶೆಟ್ಟಿ ಅವರೇ ಬರೆದಿದ್ದಾರೆ. ಉಳಿದಂತೆ ಚಿತ್ರದಲ್ಲಿ ಭೋಜರಾಜ ವಾಮಂಜೂರು, ಪ್ರಸನ್ನ ಶೆಟ್ಟಿ ಬೈಲೂರು, ಉಮೇಶ್‌ ಮಿಜಾರ್‌, ಸಂದೀಪ್‌ ಶೆಟ್ಟಿ ಮಾಣಿಬೆಟ್ಟು ಮುಂತಾದ ಕಲಾವಿದರಿದ್ದಾರೆ.