ವಿಶ್ವಕಪ್: ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನವನ್ನು ಸದೆಬಡಿದ ಟೀಂ ಇಂಡಿಯಾ

•   Mon, Jun 17 2019 12:24:00 AM



• ಮ್ಯಾಂಚೆಸ್ಟರ್, ಜೂ 16 (Daijiworld News/SM): ಇಡೀ ವಿಶ್ವದ ಗಮನ ಸೆಳೆದಿದ್ದ ಭಾರತ-ಪಾಕ್ ವಿರುದ್ದದ ಹೈವೋಲ್ಟೇಜ್ ಪಂದ್ಯದಲ್ಲಿ ಟೀಂ ಇಂಡಿಯಾ ಪಾಕಿಸ್ತಾನವನ್ನು ಬಗ್ಗುಬಡಿದಿದೆ. ಪದೇಪದೆ ಮಳೆ ಅಡ್ಡಿಪಡಿಸಿದ ಹಿನ್ನೆಲೆಯಲ್ಲಿ ಅಂತಿಮವಾಗಿ ಡಕ್ ವರ್ತ್ ಲೂಯೀಸ್ ನಿಯಮದ ಪ್ರಕಾರ ಪಂದ್ಯವನ್ನು ೪೦ ಓವರ್ ಗಳಿಗೆ ಸೀಮಿತಗೊಳಿಸಲಾಗಿತ್ತು.

  

  ಸಾಂಪ್ರದಾಯಿಕ ಎದುರಾಳಿ ಪಾಕ್​ ವಿರುದ್ಧ ಭಾರತ ಗೆದ್ದು ಬೀಗಿದ್ದು, ಕೋಟ್ಯಾಂತರ ಅಭಿಮಾನಿಗಳ ಆಶಯ ಕಡೆಗೂ ನೆರವೇರಿದೆ. ಡಕ್​ವರ್ತ್ ಲೂಯೀಸ್​ ನಿಯಮದ ಪ್ರಕಾರ 89 ರನ್​ಗಳ ಅಂತರದಲ್ಲಿ ಪಾಕಿಸ್ತಾನಕ್ಕೆ ಸೋಲಿನ ಕಹಿ ನೀಡಿದೆ.

  ಟಾಸ್​ ಸೋತು ಮೊದಲು ಬ್ಯಾಟಿಂಗ್​ ಮಾಡಿದ ಭಾರತ, ನಿಗದಿತ 50 ಓವರ್​ಗಳಲ್ಲಿ 5 ವಿಕೆಟ್​ ನಷ್ಟಕ್ಕೆ 336 ರನ್​ ಗಳಿಸಿ ಪಾಕ್​ಗೆ ಗೆಲ್ಲಲು​ ಬೃಹತ್​ ಮೊತ್ತದ ಗುರಿ ನೀಡಿತು. ಗುರಿ ಬೆನ್ನತ್ತಿದ ಪಾಕ್​, ಆರಂಭದಲ್ಲೇ ಆಘಾತಕ್ಕೊಳಗಾಯ್ತು. ಪಾಕ್​ನ ಆರಂಭಿಕ ಆಟಗಾರರಾದ ಇಮಾಮ್​ -ಉಲ್​-ಹಕ್ ಹಾಗೂ ಫಖಾರ್​ ಝಮಾನ್​ ತಾಳ್ಮೆಯ ಆಟಕ್ಕೆ ಮುಂದಾದರು. ಆದರೆ ತಮ್ಮ ಮೊದಲ ಎಸೆತದಲ್ಲೇ ವಿಜಯ್​ ಶಂಕರ್​, ಇಮಾಮ್​ -ಉಲ್​-ಹಕ್(7)​ರನ್ನು ಎಲ್​ಬಿಡ್ಲ್ಯೂ ಬಲೆಗೆ ಬೀಳಿಸಿದರು. ಬಳಿಕ ಒಂದರ ಮೇಲೊಂದರಂತೆ ಪಾಕ್ ಬ್ಯಾಟ್ಸ್ ಮನ್ ಗಳನ್ನು ಫೆವಿಲಿಯನ್ ಗೆ ಆಟ್ಟಿದರು.

  ಈ ನಡುವೆ ಪದೇ ಪದೆ ಮಳೆ ಪಂದ್ಯಕ್ಕೆ ಅಡ್ಡಿಯಾಗುತ್ತಿತ್ತು. ಅಂತಿಮವಾಗಿ ಡಕ್ ವರ್ತ್ ಲೂಯೀಸ್ ನಿಯಮದಂತೆ ೪೦ ಓವರ್ ಗೆ ಪಂದ್ಯ ಸೀಮಿತಗೊಳಿಸಲಾಯಿತು. ಆದರೆ ಗುರಿಮುಟ್ಟಲು ವಿಫಲವಾದ ಪಾಕ್ ಭಾರತಕ್ಕೆ ಶರಣಾಯಿತು.