ವಿಶ್ವಕಪ್ ನಲ್ಲಿ ದಿನಕ್ಕೊಂದು ಇತಿಹಾಸ; ದಾಖಲೆಯ 4ನೇ ಪಂದ್ಯ ರದ್ದು

•   Thu, Jun 13 2019 08:21:28 PM



• ನ್ಯಾಟಿಂಗ್​ಹ್ಯಾಮ್​, ಜೂ 13 (Daijiworld News/SM): 2019ರ ವಿಶ್ವಕಪ್ ನಲ್ಲಿ ಗೆಲುವು ಸೋಲಿಗಿಂತ ಪಂದ್ಯ ರದ್ದಾಗುವುದೇ ಜಾಸ್ತಿ ಎಂಬಾಂತಾಗುತ್ತಿದೆ. ಗುರುವಾರ ಭಾರತ-ನ್ಯೂಜಿಲೆಂಡ್​ ನಡುವಿನ ಪಂದ್ಯ ಇದರಿಂದ ಹೊರತಾಗಿಲ್ಲ. ಸುರಿದಿರುವ ಭಾರೀ ಮಳೆಯಿಂದಾಗಿ ಪಂದ್ಯ ರದ್ದಾಗಿದೆ.

  

  ಈ ಸಲದ ವಿಶ್ವಕಪ್​​ನಲ್ಲಿ ಮಳೆಯ ಅಬ್ಬರ ಜೋರಾಗಿದ್ದು, ನಾಲ್ಕು ಪಂದ್ಯಗಳನ್ನು ಇಲ್ಲಿಯ ತನಕ ರದ್ದು ಪಡಿಸಿದೆ. ಭಾರತ ಹಾಗೂ ನ್ಯೂಜಿಲೆಂಡ್​ ನಡುವಿನ ಪಂದ್ಯ ರದ್ದಾಗಿದ್ದು, ಎರಡೂ ತಂಡಗಳು ತಲಾ ಒಂದೊಂದು ಅಂಕಗಳನ್ನು ಪಡೆದುಕೊಂಡಿವೆ.

  ಬುಧವಾರ ಸುರಿದ ಮಳೆಯಿಂದಾಗಿ ಮೈದಾನ ಸಜ್ಜುಗೊಂಡಿರಲಿಲ್ಲ. ಆದರೆ ಗುರುವಾರವೂ ಪದೇ ಪದೇ ಮಳೆ ಸುರಿಯುತ್ತಿತ್ತು. ಪರಿಣಾಮ ಪಂದ್ಯಕ್ಕೆ ಅಡಚಣೆ ಎದುರಾಗಿದೆ. ಇನ್ನು ಅಂಪೈರ್​ಗಳು ಮೈದಾನಕ್ಕಿಳಿದು ಪರಿಶೀಲನೆ ನಡೆಸಿದ್ದು, ಪಂದ್ಯವನ್ನು ರದ್ದುಗೊಳಿಸಿದ್ದಾರೆ. ಆ ಮೂಲಕ ಪಂದ್ಯ ವೀಕ್ಷಣೆಗೆ ಕಾತರದಲ್ಲಿದ್ದ ಅಭಿಮಾನಿಗಳಿಗೆ ನಿರಾಸೆಯುಂಟಾಗಿದೆ. ಇನ್ನು ಭಾರತ ಜೂನ್​ 16ರಂದು ಪಾಕಿಸ್ತಾನದ ವಿರುದ್ಧ ಕಣಕ್ಕಿಳಿಯಲಿದೆ.

  ಈ ಹಿಂದೆ ಮೂರು ಪಂದ್ಯಗಳು ರದ್ದು
  ಈಗಾಗಲೇ ಪಾಕಿಸ್ತಾನ ಹಾಗೂ ಶ್ರಿಲಂಕಾ ನಡುವಿನ ಪಂದ್ಯ, ದಕ್ಷಿಣ ಆಫ್ರಿಕಾ-ವೆಸ್ಟ್​ ಇಂಡೀಸ್​​ ಹಾಗೂ ಬಾಂಗ್ಲಾದೇಶ-ಶ್ರೀಲಂಕಾ ತಂಡಗಳ ನಡುವಿನ ಪಂದ್ಯ ಮಳೆಗಾಹುತಿಯಾಗಿವೆ. ನ್ಯೂಜಿಲೆಂಡ್​ ಈಗಾಗಲೇ ಶ್ರೀಲಂಕಾ, ಬಾಂಗ್ಲಾ ಹಾಗೂ ಆಫ್ಘಾನ್​ ತಂಡಗಳ ವಿರುದ್ಧ ಗೆಲುವು ದಾಖಲು ಮಾಡಿದ್ದು ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದೆ. ಭಾರತ ಬಲಿಷ್ಠ ದಕ್ಷಿಣ ಆಫ್ರಿಕಾ ಹಾಗೂ ಆಸ್ಟ್ರೇಲಿಯಾ ವಿರುದ್ಧ ಗೆಲುವಿನ ನಗೆ ಬೀರಿದ್ದು, ಮೂರನೇ ಪಂದ್ಯ ರದ್ದಾಗಿದೆ.