ವಿಶ್ವಕಪ್: ಮೊದಲ ಪಂದ್ಯ ಗೆದ್ದು ಬೀಗಿದ ಟೀಂ ಇಂಡಿಯಾ; ಹ್ಯಾಟ್ರಿಕ್ ಸೋಲಿನ ಮೂಲಕ ಸಂಕಷ್ಟದಲ್ಲಿ ದ.ಆಫ್ರಿಕಾ

•   Wed, Jun 05 2019 11:35:06 PM



• ಸೌತಾಂಪ್ಟನ್​, ಜೂ 5 (Daijiworld News/SM): ನಿರೀಕ್ಷೆಯಂತೆ ವಿಶ್ವಕಪ್ ನ ಮೊದಲ ಪಂದ್ಯದಲ್ಲಿ ಟೀಂ ಇಂಡಿಯಾ ಗೆದ್ದು ಬೀಗಿದ್ದು, ದಕ್ಷಿಣ ಆಫ್ರಿಕಾ ತಂಡ ಹ್ಯಾಟ್ರಿಕ್ ಸೋಲಿನ ಮೂಲಕ ಸಂಕಷ್ಟದಲ್ಲಿದೆ.

  

  ವಿಶ್ವಕಪ್​ನ ಮೊದಲ ಪಂದ್ಯದಲ್ಲಿ ಹರಿಣಗಳ ವಿರುದ್ಧ ಟೀಂ ಇಂಡಿಯಾ 6 ವಿಕೆಟ್​ಗಳಿಂದ ಭರ್ಜರಿ ಗೆಲುವು ಸಾಧಿಸಿ 2019ರ ವರ್ಲ್ಡ್​ಕಪ್​ ಟೂರ್ನಿಯಲ್ಲಿ ಶುಭಾರಂಭ ಮಾಡಿದೆ.

  ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಮಾಡಿದ ದಕ್ಷಿಣ ಆಫ್ರಿಕಾ ಆರಂಭದಲ್ಲೇ ಸಂಕಷ್ಟಕ್ಕೆ ಸಿಲುಕಿತು. ಭಾರತದ ಮಾರಕ ದಾಳಿಗೆ ತತ್ತರಿಸಿದ ದ. ಆಫ್ರಿಕಾ ತಂಡ 24 ರನ್ ಗಳಿಗೆ 2 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಬಳಿಕ ಮಧ್ಯಮ ಕ್ರಮಾಂಕದಲ್ಲಿ ಚೇತರಿಕೆ ಕಂಡ ದ. ಆಫ್ರಿಕಾ 50 ಓವರ್ ಗಳಲ್ಲಿ 9 ವಿಕೆಟ್ ಗಳ ನಷ್ಟಕ್ಕೆ 227 ರನ್ ಗಳನ್ನಷ್ಟೇ ಪೇರಿಸಲು ಶಕ್ತವಾಯಿತು. ಟೀಂ ಇಂಡಿಯಾದ ಪರ ಯುಜುವೇಂದ್ರ ಚಾಹಲ್ 51 ರನ್ ಗಳನ್ನು ನೀಡಿ 4 ವಿಕೆಟ್ ಕಬಳಿಸಿದರು. ಇನ್ನು ಭುವನೇಶ್ವರ್ ಕುಮಾರ್ ಹಾಗೂ ಬುಮ್ರಾ ತಲಾ 2 ವಿಕೆಟ್ ಗಳನ್ನು ಉರುಳಿಸಿದರು. ಕುಲದೀಪ್ ಯಾದವ್ 1 ವಿಕೆಟ್ ಉರುಳಿಸಿದರು.

  ದ.ಆಫ್ರಿಕಾ ನೀಡಿದ 228 ರನ್​ಗಳ ಗುರಿ ಬೆನ್ನತ್ತಿದ ಭಾರತ ತಂಡಕ್ಕೆ ಶಾಕ್​ ನೀಡಿದ ಕಗಿಸೋ ರಬಾಡಾ 5.1 ನೇ ಓವರ್​ನಲ್ಲಿ ಶಿಖರ್​ ಧವನ್​ ವಿಕೆಟ್​ ಕಬಳಿಸಿದರು. ನಂತರ ಬಂದ ನಾಯಕ ವಿರಾಟ್​ ಕೊಹ್ಲಿ ಕೂಡ ಬಹಳ ಹೊತ್ತು ಕ್ರೀಸ್​​ ಕಚ್ಚಿ ನಿಲ್ಲಲಿಲ್ಲ. ಕೇವಲ 18 ರನ್​ ಗಳಿಸಿರುವಾಗ ಆಂಡೈಲ್​ ಫೆಹ್ಲುಕ್ವಾಯೋ ಎಸೆತದಲ್ಲಿ ದೊಡ್ಡ ಹೊಡೆತ ಬಾರಿಸಲು ಹೋಗಿ ವಿಕೆಟ್​ ಕೀಪರ್​ ಕ್ವಿಂಟನ್ ಡಿ ಕಾಕ್​​ ಗೆ ಕ್ಯಾಚ್​ ನೀಡಿ ಫೆವೀಲಿಯನ್ ನತ್ತ ಹೆಜ್ಜೆ ಹಾಕಿದರು.

  ​ನಾಯಕ ಕೊಹ್ಲಿ ಔಟ್​ ಆದ ನಂತರ ಕ್ರೀಸ್​​ಗಿಳಿದ ಕನ್ನಡಿಗ ರಾಹುಲ್​ ಕೆಲ ಹೊತ್ತು ಉತ್ತಮವಾಗಿ ಬ್ಯಾಟ್​ ಬೀಸಿ ತಂಡಕ್ಕೆ ಆಸೆರೆಯಾದರು. 26 ರನ್​ಗಳಿಸಿರುವಾಗ ರಬಾಡಗೆ ವಿಕೆಟ್​ ಒಪ್ಪಿಸಿ ಪೆವಿಲಿಯನ್​ ಸೇರಿಕೊಂಡರು. ಒಂದೆಡೆ ಟೀಂ ಇಂಡಿಯಾದ ವಿಕೆಟ್​ ಬೀಳುತ್ತಲೇ ಇದ್ದರೆ ಇತ್ತ ತಾಳ್ಮೆಯಿಂದ ಬ್ಯಾಟ್ ಬೀಸಿದ ಹಿಟ್​ ಮ್ಯಾನ್​ ರೋಹಿತ್ ​ಶರ್ಮಾ ಏಕದಿನ ಕ್ರಿಕೆಟ್​ನಲ್ಲಿ ತನ್ನ 23 ನೇ ಶತಕ ಪೂರೈಸಿದರು.

  ಇನ್ನು ಕನ್ನಡಿಗ ರಾಹುಲ್ ಔಟ್ ಆದ ಬಳಿಕ ಕಣಕ್ಕಿಳಿದ ಮಹೇಂದ್ರಸಿಂಗ್​ ಧೋನಿ, ರೋಹಿತ್ ಜೊತೆ ಸೇರಿಕೊಂಡು​ ತಂಡಕ್ಕೆ ಆಸರೆಯಾದರು. ಹಾಗೂ ತಂಡವನ್ನು ಗೆಲುವಿನ ಹತ್ತಿರಕ್ಕೆ ತಂದು ನಿಲ್ಲಿಸಿದರು. ಅಂತಿಮವಾಗಿ ರೋಹಿತ್​ ಶರ್ಮಾ ಮತ್ತು ಹಾರ್ದಿಕ್​ ಪಾಂಡ್ಯ ತಂಡವನ್ನ ಗೆಲುವಿನ ದಡ ಸೇರಿಸಿದರು.

  ಟೀಂ ಇಂಡಿಯಾಕ್ಕೆ ನೆರವಾದ ರೋಹಿತ್
  ಭಾರತ ತಂಡ ಪರ ರೋಹಿತ್​ ಶರ್ಮಾ ತಾಳ್ಮೆಯ ಆಟವನ್ನಾಡಿ ಶತಕ ಪೂರೈಸಿ ಪಂದ್ಯದ ಕೊನೇ ತನಕ ಅಜೇಯರಾಗಿ ಉಳಿದರು. ೧೪೪ ಎಸೆತಗಳನ್ನು ಎದುರಿಸಿದ ರೋಹಿತ್ 13 ಬೌಂಡರಿ ಹಾಗೂ 2 ಭರ್ಜರಿ ಸಿಕ್ಸರ್​ಗಳ ನೆರವಿನಿಂದ 122 ರನ್ ಕಳೆಹಾಕಿದರು. ಆರಂಭದಿಂದಲೂ ನಿಧಾನಗತಿಯ ಹಾಗೂ ತಾಳ್ಮೆಯ ಆಟವನ್ನಾಡಿದ ರೋಹಿತ್ ತಂಡವನ್ನು ಗೆಲುವಿನ ದಡ ಸೇರಿಸಿದರು.